Carlos Casares Mouriño

Lugar: Ourense

Data Nacemento: 24/08/1941

09/03/2002

Actividade Profesional: Aos 4 anos, a familia de Carlos instálase en Xinzo de Limia, onde o pai exerce como mestre. Pasa tempadas en Lamas e Sabucedo, nas casas dos seus parentes, sobre todo nos períodos vacacionais. Familiarízase co mundo da aldea e coa anatureza.
Ingresa no Seminario Menor de Ourense en 1952. Ao abandonar o internado, gaña un concurso de relatos, o que lle permite coñecer a Vicente Risco e participar nas tertulias de escritores e artistas.
En 1961 marcha para Compostela estudar Filosofía e Letras. Milita de inmediato no galleguismo, que tutela Ramón Piñeiro e revélase como escritor co libro de relatos Vento Ferido (1967). Comeza a colaborar no xornal La Región de Ourense. Entra como docente nun colexio de Viana do Bolo, do que é expulsado por “subversivo” e inhabilitado para exercer en territorio galego. Casares marcha entón para Bilbao.
En 1971, nun tren que vai para Compostela, Carlos coñece e namora unha moza sueca, Kristina Berg, coa que casa ao pouco. Suecia vaise converter no seu modelo de país. Consolídase como escritor coa publicación de varios libros. Segue a colaborar coa prensa (La Región, La Voz de Galicia). Establece unha forte vinculación coa editora Galaxia e co seu compromiso cultural. Daquela, mora e traballa como docente en Cangas do Morrazo. En 1976 recibe o Premio da Crítica Española e dous anos máis tarde ingresa na RAG.