Da man do Instituto Galego de Estudos Internacionais e da Paz, o Museo Etnográfico da Limia e a taberna a Arca da Noe, Vilar de Santos tornouse, unha vez máis, epicentro cultural da Limia.
Correspondeulle ao membro do IGESIP, Artur Alonso Novelhe, dar comezo cara ás 10h30 da mañá, a unha xornada que dende primeira hora, contou cun posto de libros comandado polo sociólogo e libreiro Antonio Alberto Alves, dono do estaleiro cultural «Traga-Mundos» (Vila Real, Trás-Os-Montes). A conferencia de Novelhe titulada «A Tripla Libertação», deu paso á palestra de Rhicardo Ribeiro, quen chegado do Porto (Portugal) se debruzou sobre o concepto de Sinarquía. Xa pola tarde foi a vez de Jairo Mozart, quen cara as 17h00 nos ilustrou sobre a diversidade indíxena do xigante latinoamericano, Brasil.
Das paredes do Museo, entre tanto, penduraban xa os cadros da exposición «Ríos da Galiza e Norte de Portugal» proxecto da asociación «Cultura Que Une» e da cal daremos boa conta noutra nova.
A última das intervencións na sala de conferencias do Museo correu a cargo do poeta limiao Xabier Xardón quen tratou de traspasar esa fina liña que a Raia é.
A Arca da Noe acolleu a parte final da xornada
O I Encontro na Raia trasladouse a continuación á Rúa do Forno 13, á taberna «A Arca da Noe», onde a tamén limiá poeta Concha Rousia, nos presentou o seu novo traballo «Se Os Carvalhos Falassem» (Através Editora), a presentación da autora correu da man de Irene Veiga.
Por último, e para rematar a xornada, desfrutamos da música de Jairo Mozart e Fred Martins.
Máis imaxes da xornada
